Eignir 1.013 milljarðar og ávöxtun 14,7%
Rekstur LV gekk vel á árinu og afkoma eignasafna var góð þrátt fyrir krefjandi aðstæður vegna heimsfaraldurs. Heildareignir námu 1.013 milljörðum króna um áramót og jukust þær um 145 milljarða króna á árinu.
20. feb. 2021
Rekstur LV gekk vel á árinu og afkoma eignasafna var góð þrátt fyrir krefjandi aðstæður vegna heimsfaraldurs. Heildareignir námu 1.013 milljörðum króna um áramót og jukust þær um 145 milljarða króna á árinu. Þar af námu fjárfestingatekjur 130 milljörðum króna. Sjóðfélögum á lífeyri fjölgaði áfram á árinu og voru um 20 þúsund í lok árs samanborið við 19 þúsund árið áður. Ávöxtun eigna var góð líkt og undanfarin ár og er sjóðurinn vel í stakk búinn til að takast á við þær áskoranir sem fylgja hækkandi lífaldri þjóðarinnar.
Ársskýrsla LV veður birt í aðdraganda ársfundar. Þar eru sífellt ítarlegri upplýsingar um starfsemi sjóðsins sem gefa sjóðfélögum og öðrum haghöfum tækifæri til að glöggva sig á starfseminni.
Helstu tölur fyrir árið 2020:
- Lífeyrisgreiðslur jukust um 12,5% og voru alls 18 milljarðar króna úr sameignardeild til 20 þúsund lífeyrisþega, eða 7,4% fleiri en árið áður
- 48 þúsund sjóðfélagar greiddu iðgjöld til sjóðsins
- Tryggingafræðileg staða Lífeyrissjóðs verzlunarmanna er jákvæð sem nemur 10,9%. Sú staða þýðir að sjóðurinn er vel í stakk búinn til að takast á við þá áskorun sem leiðir af hækkandi aldri þjóðarinnar og þar með að sjóðfélagar fá greiddan lífeyri lengur en áður
- Heildareignir voru 1.013 milljarðar króna í lok árs 2020, eða sem nemur 145 milljörðum meiri en árið áður
- Langtímaávöxtun sjóðsins er áfram góð, fimm ára árleg meðalávöxtun er 6,2%, tíu ára meðalávöxtun 6,7% og 20 ára meðalávöxtun er 4,5%
- Ávöxtun eigna 2020 nam 14,7% sem samsvarar 10,8% hreinni raunávöxtun. Fjárfestingatekjur á árinu voru 130 milljarðar
- Vægi erlendra eigna hækkaði og var í lok ársins 43% eignasafnsins
Vaxandi eignir
Eignir hækkuðu alls um 145 milljarða króna á árinu 2020, þar af voru fjárfestingatekjur 130 milljarðar, og námu eignirnar samtals 1.013 milljörðum samanborið við 868 milljarða árið áður.
![](/media/bc1mwrrr/skiptingeignasafns.png?rmode=max&width=450&height=410)
Mikil áhættudreifing eigna
Eignasafn sjóðsins er vel áhættudreift. Erlend verðbréf voru um 43% heildareigna í lok ársins samanborið við 40% í árslok 2019. Um 17% eignanna eru í innlendum hlutabréfum, 17% í ríkisskuldabréfum. Sjóðfélagalán námu 95,8 milljörðum, eða um 9,5% af heildareignum samanborið við 120,7 milljarða og 14% af eignum árið áður.
![](/media/o5rg1jqm/lifeyrisgreidslur.png?rmode=max&width=450&height=410)
Lífeyrisgreiðslur aukast stöðugt
Á árinu 2020 fengu að meðaltali 20 þúsund sjóðfélagar lífeyrisgreiðslur úr sameignardeild sjóðsins (ellilífeyrir, örorku-, maka- og barnalífeyrir) samanborið við 19 þúsund árið áður. Lífeyrisgreiðslur úr sameignardeild sjóðsins voru að fjárhæð 18 milljarðar króna. Árið áður námu lífeyrisgreiðslur úr sameignardeild 16 milljörðum og hækkuðu því um 12,5%. Lífeyrisgreiðslur úr séreignardeild námu 1 milljarði króna.
![](/media/y5wdh20i/tryggingafraedilegstada.png?rmode=max&width=450&height=410)
Sterk tryggingafræðileg staða
Tryggingafræðileg staða er mælikvarði á getu sjóðsins til að standa undir lífeyrisskuldbindingum sínum. Undanfarin ár hefur tryggingafræðileg staða sjóðsins verið sterk og styrktist enn á liðnu ári, var jákvæð um 10,9% í lok ársins samanborið við 8,6% árið áður.
![](/media/qmgnsuzb/arlegraunavoxtun.png?rmode=max&width=450&height=409)
Góð langtímaávöxtun
Langtímaávöxtun sjóðsins og tryggingafræðileg staða er góð og styrkir stoðir undir réttindi sjóðfélaga og gerir sjóðnum kleift að takast á við þær áskoranir sem fylgja hækkandi lífaldri þjóðarinnar.